ការរៀបចំការទទួលស្គាល់គ្នាទៅវិញទៅមកលើសេវាថែទាំ (MRA-NS)
ទីផ្សាតែមួយរបស់អាស៊ានផ្តល់នូវសក្តានុពលយ៉ាងខ្លាំងសម្រាប់ប្រទេសសមាជិកអាស៊ានដែលមានការអភិវឌ្ឍន៍តិចតួចដូចជា ប្រទេសកម្ពុជា ខណៈដែលពួកគេអាចធ្វើដំណើរចូលក្នុងទីផ្សាក្នុងតំបន់កាន់តែងាយស្រួល និងបានដឹងពីទំហំនៃសេដ្ឋកិច្ច។ បញ្ហានេះក៍ជាបញ្ហាប្រឈមផងដែរពីព្រោះវាតម្រូវឱ្យមានការបង្កើនចំណេះដឹង ជំនាញ និងការច្នៃប្រឌិតនៃកម្លាំងពលកម្មរបស់ខ្លួន។
សម្រាប់អាស៊ាន វិស័យថែទាំសុខភាពជាអាទិភាព។ ប្រទេសសមាជិកអាស៊ានបានរំពឹងថានឹងបង្កើនចំណាយលើសុខភាពដើម្បីផ្តល់នូវសេវាថែទាំសុខភាពដែលប្រសើរជាងនេះ។ ទោះជាយ៉ាងណាក៍ដោយកង្វះខាតអ្នកជំនាញផ្នែកថែទាំសុខភាពដែលមានសមត្ថភាព និងការខ្វះខាតគិលានុបដ្ឋាកគឺជាឧបសគ្គមួយ។ នៅក្នុងប្រទេសកម្ពុជា មានគិលានុបដ្ឋាកតិចជាង ០១ (មួយ) ឬឆ្មប ដើម្បីមើលថែប្រជាជនចំនួន ១,០០០នាក់ បើប្រៀបធៀបទៅនឹងប្រទេសអាល្លឺម៉ង់គឺមាន ១១ (ដប់មួយ) នាក់។
នៅគ្រប់ប្រទេសទាំងដប់ក្នុងសមាគមប្រជាជាតិអាស៊ីអាគ្នេយ៍ (អាស៊ាន) ការងារពង្រឹងវិជ្ជាជីវៈថែទាំកំពុងត្រូវបានអនុវត្តឡើង។ រដ្ឋាភិបាលប្រទេសនីមួយៗបានចុះហត្ថលេខាលើកិច្ចព្រមព្រៀងទទួលស្គាល់គ្នាទៅវិញទៅមកក្នុងសេវាថែទាំ (MRA-NS)។
គោលបំណងដែលបានព្រមព្រៀងគ្នាដោយរដ្ឋាភិបាលប្រទេសនីមួយៗ រួមទាំងរាជរដ្ឋាភិបាលកម្ពុជាបានយល់ព្រមថា៖
- ធ្វើឱ្យប្រសើរឡើងលើស្តង់ដារ និងគុណវឌ្ឍន៍វិជ្ជាជីវៈក្នុងប្រទេសកម្ពុជាដើម្បីអាចផ្គូរផ្គងជាមួយបណ្តាប្រទេសសមាជិកអាស៊ានផ្សេងៗទៀត
- ធ្វើឱ្យប្រសើរឡើងលើសេវាថែទាំប្រកបដោយវិជ្ជាជីវៈនៅក្នុងប្រទេសកម្ពុជា
- ផ្តល់ឱកាសបន្ថែមទៀតដើម្បីធ្វើការកសាងសមត្ថភាព និងការបណ្តុះបណ្តាលគិលានុបដ្ឋាកនៅក្នុងប្រទេសកម្ពុជា
- ធ្វើឱ្យមានលក្ខណៈងាយស្រួលសម្រាប់គិលានុបដ្ឋាកកម្ពុជាដែលមានបរិញ្ញាប័ត្រវិទ្យាសាស្រ្តថែទាំដើម្បីទៅធ្វើការនៅតាមបណ្តាប្រទេសសមាជិកអាស៊ានផ្សេងៗទៀត
គោលបំណងនៃកិច្ចព្រមព្រៀងស្តីពីការទទួលស្គាល់ទៅវិញទៅមកលើសេវាថែទាំ (MRA NS) នេះរួមមាន៖
- សម្របសម្រួលចល័តភាពរបស់អ្នកជំនាញប្រកបដោយវិជ្ជាជីវៈលើការផ្តល់សេវាថែទាំក្នុងអាស៊ាន
- ផ្តោះប្តូរព័ត៌មាន និងជំនាញឯកទេសលើស្តង់ដា និងគុណវឌ្ឍិ
- ជម្រុញឲ្យមានការទទួលយកការអនុវត្តល្អៗលើសេវាថែទាំប្រកបដោយវិជ្ជាជីវៈ និង
- ផ្តល់ឪកាសឲ្យមានការកសាងសមត្ថភាព និងការបណ្តុះបណ្តាលដល់គិលានុបដ្ឋាក/យិកា
