Select Page

ហេតុអ្វី​ក្លាយ​ខ្លួន​ជា​គិលានុបដ្ឋាក

នៅ​ពេល​ដែល​យើង​កំពុង​តែ​ស្វែងរក​អាជីព​ការងារ​មួយ​ដែល​សមរម្យ មនុស្ស​កាន់តែ​ច្រើន​ឡើងៗ​នឹង​ស្វែងរក​ការងារ​មួយ​ដែល​សំខាន់​យ៉ាងពិត​ប្រាកដ។ ការ​មាន​ការងារ​តាម​ក្តី​បំណង​គឺ​មាន​ន័យថា​អ្នក​មាន​ការ​ពេញចិត្ត​លើ​ការ​លៈបង់​ទាំង​ពេល​វេលា កម្លាំង​កាយ និង​កម្លាំង​ប្រាជ្ញា​លើ​ហេតុផល​មួយ​ដ៍​សក្តិសម។ មានន័យថា​អ្នក​មាន​មោទនភាព​ក្នុង​ការ​ប្រាប់​ក្រុម​គ្រួសារ និង​មិត្តភក្តិ​របស់​អ្នក​ពី​អ្វី​ដែល​អ្នក​បាន​ធ្វើ។ តើ​មាន​សមិទ្ធិផល​អ្វី​ប្រសើរ​ជាង​ការ​ជួយ​អ្នក​ដ៍ទៃ​ជា​រៀងរាល់​ថ្ងៃតាម​រយៈ​ក្លាយ​ខ្លួន​ជាគិលានុបដ្ឋាក/យិកា​ដ៍​ស្វាហាប់​ម្នាក់?

ប្រសិន​បើអ្នក​ពុំទាន់​បាន​ធ្វើ​ការ​សម្រេចចិត្ត ហើយ​អ្នក​កំពុង​ធ្វើការ​ពិចារណា​ដើម្បី​ក្លាយ​ខ្លួន​ជា​គិលានុបដ្ឋាក/យិកា​ស្របច្បាប់​មួយ​រូប នោះ​អ្នក​គួរតែ​ពិចារណា​លើ​ហេតុផល​ចម្បង​មួយ​ចំនួន ថាតើ​ហេតុ​អ្វី​បាន​ជា​អ្នក​ជ្រើសរើស​អាជីព​មួយនេះ។

១. អ្នក​នឹង​ដើរ​តួនាទី​យ៉ាង​សំខាន់​ក្នុង​ការ​ផ្តល់​ការ​ថែទាំ​សុខភាព​ប្រកប​ដោយ​គុណភាព​ខ្ពស់

ទិដ្ឋភាព​ជាក់​ស្តែង​នៃ​ប្រព័ន្ធ​សុខាភិបាល​មួយ​នឹង​ត្រូវ​បាន​ផ្តោត​សំខាន់​លើស​មត្ថភាព​របស់បុគ្គលិក​សុខា​ភិបាល​ផ្ទាល់​តែ​ម្តង។ ដោយ​សារ​តែ​គិលានុបដ្ឋាក/យិកា​ទាំង​អស់​បង្កើត​បាន​ជា​អង្គភាព​ជំនាញ​វិជ្ជាជីវៈ​ផ្នែក​ថែ​ទាំ​ដ៍​ធំ​តែ​មួយ​គត់​ក្នុង​ចំណោម​អ្នក​ផ្តល់​សេវា​សុខភាព ការ​ធានា​លើ​បរិមាណ និង​គុណភាព​គឺជា​គន្លឹះ​ដើម្បី​សម្រេច​បាន​នូវ​លទ្ធផល​ជាវិជ្ជមាន​ដ៍​ធំមួយ​នៃ​សង្គម​វេជ្ជសាស្រ្ត​ទាំង​មូល។ ការ​ប្រកប​ការងារ​ដោយ​ឯករាជ្យ ឫ​ជា​ផ្នែក​មួយ​នៃ​ក្រុម​ការងារ​ពហុជំនាញ​វិជ្ជា​ជីវៈ​ដ៍​ធំ​ជាង​គេ គិលានុបដ្ឋាក/យិកា​ដើរ​តួនាទី​យ៉ាង​សំខាន់​ក្នុង​ការ​លើក​កម្ពស់ និង​ផ្តល់​សេវា​សុខភាព។

វិជ្ជា​ជីវៈ​ថែទាំ​គឺ​ជា​វិជ្ជាជីវៈ​មួយ​ដែល​មាន​តម្រូវ​ការ​ជាងគេ​បំផុត​លើ​ពិភពលោក ដោយ​សារ​តែគិលានុបដ្ឋាក/យិកា​គ្រប់​រូប​ត្រូវ​ទទួល​យក​នូវ​តូនាទី​ជា​ច្រើន​ខុសៗ​គ្នា​ក្នុង​ពេល​តែមួយ អាស្រ័យ​លើ​តម្រូវ​ការ​ជាក់​ស្តែង​របស់​អ្នក​ជម្ងឺ​ម្នាក់ៗ។ ក្រៅ​ពី​ការ​ដើរ​តួជា​អ្នក​ទំនាក់ទំនង គ្រូ​បង្រៀន និងអ្នក​តស៊ូ​មតិ​របស់​អ្នក​ជម្ងឺ គិលានុបដ្ឋាក/យិកា​គឺជា​អ្នក​ផ្តល់​ការ​ថែ​ទាំ​ដំបូង និង​សំខាន់​បំផុត។ ក្នុង​ដំណើរ​ការ​ការព្យាបាល វា​ជាតួនាទី​របស់​គិលានុបដ្ឋាក/យិកា​ដើម្បី​តាម​ដាន​ការវិវឌ្ឍ​របស់​អ្នក​ជម្ងឺ និង​ធ្វើការ​តាម​ដាន​ស្ថានភាព​ដោយ​យក​ចិត្ត​ទុកដាក់​បំផុត។
ទោះ​ជា​យ៉ាង​ណា​ក៍​ដោយ ការ​ថែទាំ​ដែល​ផ្តល់​ឲ្យ​ដោយ​គិលានុបដ្ឋាក/យិកា​គឺ​លើស​ពី​ការ​គ្រប់គ្រង​លើ​វេជ្ជបញ្ជា និង​ការ​រៀបចំ​តម្រូវ​ការ​គិលានុបដ្ឋាក/យិកា​ទៅ​ទៀត។ សេវា​ថែទាំ​ប្រកប​ដោយ​គុណភាព​ខ្ពស់ គឺជា​ផ្នែក​មួយ​នៃ​វិធីសាស្រ្ត​នៃ​ការ​ថែទាំ​សុខភាព​ដែល​រួម​បញ្ចូល​ទាំង​តម្រូវការ​ចិត្តសាស្រ្ត ការ​អភិវឌ្ឍ វប្បធ៌ម និង​វិចារណញាណ​របស់​អ្នក​ជម្ងឺ។ ដោត​ទទួល​បាន​ជោគជ័យ​លើ​ការ​អនុវត្ត​តួនាទី​ច្រើន​ផ្សេងៗ​គ្នា​នៅ​ក្នុង​ប្រព័ន្ធសុខាភិបាល​ប្រកប​ដោយ​ប្រសិទ្ធ​ភាព ​គិលានុបដ្ឋាក/យិកា​ត្រូវ​បាន​ចាត់​ទុក​ជា​បេះដូង​នៃ​សុខាភិបាល។

២. អ្នក​នឹង​ក្លាយ​ជា​មនុស្ស​ដែល​គេ​ត្រូវ​ការ​ច្រើន​ក្នុង​ពេល​អនាគត

យោង​តាម​ទិន្នន័យ​របស់​អង្គការ​សុខភាព​ពិភពលោក (WHO) តំបន់​អាស៊ីអាគ្នេយ៍​គឺជា​តំបន់​មួយ​ដែល​មាន​ដង់ស៊ីតេ​នៃ​អ្នក​ជំនាញ​ផ្នែក​ថែទាំ​សុខភាព​ទាប​ជាង​គេ​បំផុត​នៅ​ក្នុង​ពិភពលោក ​ជាមួយ​នឹង​ចំនួន​វេជ្ជបណ្ឌិត គិលានុបដ្ឋាក/យិកា និង​ឆ្មប​តិច​ជាង​តំបន់​ផ្សេងៗ​ទៀត​ដូចជា អាស៊ី​ខាង​ត្បូង និង​អនុតំបន់​សាហារ៉ា ទ្វីបអាហ្រ្វិក។ ជាឧទាហរណ៍ ប្រទេសកម្ពុជា ជា​ប្រទេស​មួយ​ដែល​នៅ​ក្រោម​ខ្សែ​បន្ទាត់​គោល​លើ​អ្នក​ជំនាញ​សុខាភិបាល​គឺ ២២,៨នាក់ ធៀប​នឹង​ចំនួន​ប្រជាជន​១០,០០០នាក់​នៅ​ក្នុង​ឆ្នាំ ២០១០ ដោយ​ហេតុ​នេះ​ហើយ​ទើប​ប្រទេស​កម្ពុជា​ពុំ​បាន​បំពេញ​តាម​ស្តង់​ដារ​បទដ្ឋាន​មូលដ្ឋាន​នៃ​ការ​ថែទាំ​សុខភាព​របស់​អង្គការសុខភាព​ពិភពលោក​នោះ​ទេ។

មាន​គិលានុបដ្ឋាក/យិកា​ចំនួន​តែ ០,៩នាក់​ប៉ុណ្ណោះ​ធៀប​លើ​ចំនួន​ប្រជាជន ១,០០០នាក់​ក្នុង​ឆ្នាំ ២០១១ ប្រទេស​កម្ពុជា​កំពុង​រង​នូវ​ការ​ខ្វះខាត​គិលានុបដ្ឋាក/យិការ​បឋម និង​ជាពិសេស​គិលានុបដ្ឋាក/យិកា​បរិញ្ញា ដែល​គិលានុបដ្ឋាក/យិកា​ទាំង​ពីរ​ប្រភេទ​នេះ​មាន​ចំនួន​រហូត​ដល់ ៤២,៥% នៃ​ចំនួន​បុគ្គលិក​សុខាភិបាល​ទាំងអស់។ ក្រៅ​ពី​នេះ​ទៀត អតុល្យភាព​នៃ​ការ​ពង្រាយ​ចំនួន​គិលានុបដ្ឋាក/យិកា​តាម​តំបន់​ទី​ប្រជុំជន និង​ទី​ដាច់​ស្រយាល ជា​បញ្ហា​ប្រឈម​មួយ​ផ្សេង​ទៀត​នៃ​ធនធាន​មនុស្ស​របស់​ប្រទេស​លើ​ស្ថានភាព​សុខាភិបាល​បច្ចុប្បន្ន។

ក្នុង​ខណៈពេល​នេះ​គិលានុបដ្ឋាក/យិកា​ដែល​បាន​ចូល​បម្រើ​ការងារ​របស់​ក្រសួង​សុខាភិបាល​កើន​ឡើង​ប្រមាណ ៤,៧% ក្នុង​ចន្លោះ​ឆ្នាំ ២០១០ ដល់ ឆ្នាំ២០១៥ តាម​ការ​រំពឹង​ទុក​ក្នុង​រយៈពេល​ប៉ុន្មាន​ឆ្នាំ​ខាង​មុខ​ទៀត​នេះ តម្រូវ​ការ​ការងារ​ផ្នែក​គិលានុបដ្ឋាក/យិកា​នឹង​កើន​ឡើង​យ៉ាង​ខ្លាំង​ ដោយ​សារ​តែ​កំណើន​ផ្នែក​សេដ្ឋកិច្ច​នឹង​ជួយ​បង្កើន​នូវ​តម្រូវ​ការ​ការ​ថែទាំ​សុខា​ភិបាល​ជា​មួយ​គុណភាព​កាន់​តែ​ប្រសើរ​ជា​លំដាប់។ ទាក់ទង​នឹង​បញ្ហា​ខាង​លើ​នេះ​ដែរ​សេវា​សុខាភិបាល​ជា​វិស័យ​អាទិភាព​មួយ​នៃ​ផែនការ​លម្អិត​របស់​សហគមន៍​សេដ្ឋកិច្ច​អាស៊ាន (ASEAN Economic Community Blueprint) ការ​បង្កើន​ការ​ចំណាយ​លើ​ផ្នែក​សុខាភិបាល​នៅ​ទូទាំង​តំបន់​អាស៊ីអាគ្នេយ៍ ​ដែល​នឹង​ផ្តល់​ការ​លើក​ទឹក​ចិត្ត​ដល់​ប្រជាជន​ជា​ច្រើន​ឲ្យ​ចូលចិត្ត​ការងារ​ថែទាំ។

៣. អ្នក​នឹង​មាន​ឳកាស​គ្រប់គ្រាន់​លើ​ការ​ចាប់​យក​អាជីព​គិលានុបដ្ឋាក/យិក

ការ​ថែទាំ​គឺ​ជា​វិជ្ជាជីវៈ​ចម្រុះ​ដែល​បង្ហាញ​អ្នក​ទៅកាន់​ប្រធានបទ​ដែល​កើត​ឡើង​ខុសៗ​គ្នា​ដូចជា ​បញ្ហា​ផ្ទាល់​ខ្លួន គ្រួសារ និង​ផ្នែក​សុខភាព​សហគមន៍ អាហាររូបត្ថម្ភ និងឪសថ ឳសថវិទ្យា សុខភាព​ផ្លូវចិត្ត និង​ការ​លូតលាស់ និង​ការ​អភិវឌ្ឍន៍​របស់​មនុស្ស។ ការ​រៀន​ចប់​កម្មវិធី​ថែទាំ​ដោយ​ជោគជ័យ អ្នក​នឹង​ទទួល​បាន​នូវ​ចំណេះដឹង​ដ៍​ទូលំទូលាយ​ដែល​អ្នកអាច​យក​ទៅ​អនុវត្ត​នូវ​គ្រប់ទី​កន្លែង​ទាំង​អស់។

វិជ្ជាជីវៈ​មួយ​ចំនួន​ផ្តល់​ឲ្យ​អ្នក​នូវ​ជម្រើស​នៃ​កន្លែង​ធ្វើការ ផ្នែក​ដែល​ត្រូវ​ចាប់​យក​ជាជំនាញ ឫ​សញ្ញាបត្រ​ដែល​ត្រូវ​ប្រើ។ មិន​ថា​អ្នក​ជ្រើសរើស​ជា​គិលានុបដ្ឋាក/យិកា​ទូទៅ គិលានុបដ្ឋាក/យិកា​ជំនាញ ឫ​គិលានុបដ្ឋាក/យិកា​ជំនាញ​ព្យាបាល​ដែល​មាន​ជំនាញ​ផ្នែក​ជម្ងឺ​បេះដូង ជម្ងឺ​កុមារ ឫ​សុខភាព​ផ្លូវ​ចិត្ត ការងារ​របស់​អ្នក​នឹង​ផ្តល់​ឲ្យ​អ្នក​នូវ​ភាព​បត់បែន​ដើម្បី​ឲ្យ​មាន​ការ​រីកចម្រើន និង​ឳកាស​ដើម្បី​រៀន​សូត្រ​នូវ​ជំនាញ​វិជ្ជាជីវៈ​ថ្មី​ក្នុង​ខណៈ​ពេល​ដែល​អាច​រក្សា​បាន​នូវ​ជីវិត​ក្រៅ​អាជីព។

លើស​ពីនេះ​ទៀត ក្រៅ​ពី​តម្រូវ​ការ​នៅ​តំបន់​ទី​ប្រជុំជន និង​ទី​ជនបទ​នៃ​ប្រទេស​កម្ពុជា ជំនាញ​ដែល​អ្នក​បាន​សិក្សា​នឹង​ត្រូវ​បាន​ទទួល​ស្គាល់​ជា​សកល ដូច្នេះ​វា​អនុញ្ញាត​ឲ្យ​អ្នក​ធ្វើ​ការងារ​ក្នុង​បរិបទ​ផ្សេងៗ​គ្នា​នូវ​គ្រប់​តំបន់​ទាំង​អស់​លើ​ពិភពលោក។ រាប់​ចាប់​តាំង​ពី​មន្ទីពេទ្យរដ្ឋ និង​ឯកជន ​ការ​ថែទាំ​តាម​គេហដ្ឋាន មជ្ឈមណ្ឌល​សុខភាព​សហគមន៍ និង​បន្ទប់​ពិគ្រោះ​ជម្ងឺ​របស់​វេជ្ជបណ្ឌិត ​រហូត​ដល់​សាលា​បណ្តុះបណ្តាល អង្គភាព​រដ្ឋបាល។ល។ ស្ទើរ​តែ​គ្រប់​ទីកន្លែង​ទាំង​អស់​ដែល​អ្នកបាន​ឃើញ គឺ​មាន​តម្រូវការ​ផ្នែក​ថែទាំ និង​លើស​ពីនេះ​ទៀត​នោះ​ការ​ស្វែង​រក​ការងារ​មួយ​ដែល​សាក​សម​មិនមែន​ជា​ការងាយ​ស្រួល​នោះ​ទេ។

៤. គោល​បំណង​របស់​អ្នក សេចក្តី​ត្រូវ​ការ​របស់​អ្នក វិជ្ជាជីវៈ​របស់​អ្នក

ការងារ​ថែទាំ​គឺជា​អាជីព​មួយ​ដែល​ទទួល​ការ​កោត​សរសើរ អស្ចារ្យ និង​ប្រកួត​ប្រជែង​យ៉ាង​ខ្លាំងដែល​អនុញ្ញាត​ឲ្យ​អ្នក​ធ្វើ​នូវ​រឿង​ដែល​ខុស​ប្លែក​ត្រឹមត្រូវ​ក្នុង​ខណៈ​ពេល​បំពេញ​ការងារ។ ការងារ​ជា​គិលានុបដ្ឋាក/យិកា​នឹង​ផ្តល់​អត្ថប្រយោជន៍​យ៉ាង​ច្រើន​សម្រាប់​សង្គម​ទាំង​មូល។ មិន​ថា​អ្នក​ផ្តល់​វេជ្ជបញ្ជា ឫ​ការ​ថែទាំ​មនុស្ស​ចាស់ ភារកិច្ច​ប្រចាំ​ថ្ងៃ​របស់​អ្នក​ប្រាកដ​ជា​នឹង​ផ្តល់ផល​ប៉ះពាល់​លើ​ជីវិត​របស់​អ្នក​ជម្ងឺ​គ្រប់ៗ​រូប។ ប្រសិន​បើ​អ្នក​មាន​អារម្មណ៍​ពេញចិត្ត​នឹង​ការ​ជួយ​មនុស្ស និង​មានកាតព្វកិច្ច​មួយ​ដើម្បី​ផ្តល់​ជំនួយ​នូវ​គ្រប់​ពេល​វេលា​ដែល​អាច​ជួយ​បាន ទើប​ធ្វើ​ឲ្យ​យើង​ក្លាយ​ជា​បេក្ខជន​ល្អ​ឥតខ្ចោះ​សម្រាប់​កម្មវិធី​ការ​ថែទាំ។