ចូលរួមអបអរសាទរ​ ទិវាអនាម័យដៃពិភពលោក ថ្ងៃទី​ ៥ ខែឧសភា ឆ្នាំ២០២៥ ក្រោមប្រធានបទ “ពេលខ្លះយើងប្រើស្រោមដៃ ប៉ុន្តែត្រូវធ្វើអនាម័យដៃគ្រប់ពេល”​ ដែលយេីងគ្រប់គ្នាតែងតែអនុវត្តជាប់ជានិច្ច​គឺថា​ ការលាងដៃ គឺសង្គ្រោះជីវិត។

រាជធានីភ្នំពេញ៖ ថ្ងៃសុក្រ ៦កើត ខែពិសាខ ឆ្នាំម្សាញ់ សប្តស័ក ព.ស.២៥៦៨ ត្រូវនឹងថ្ងៃទី២ ខែឧសភា ឆ្នាំ២០២៥ លោក​ ជា​សុភក្ត្រមុនីរ័ត្ន​ ប្រធានក្រុមប្រឹក្សាគណៈគិលានុបដ្ឋាកជាតិអាណត្តិទី៣​ បានអញ្ជើញចូលរួមក្នុងទិវាអនាម័យដៃពិភពលោក ក្រោមប្រធានបទ “ពេលខ្លះយើងប្រើស្រោមដៃ ប៉ុន្តែត្រូវធ្វើអនាម័យដៃគ្រប់ពេល” ក្រោមអធិបតីភាព​ លោកជំទាវវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល​ និងជាតំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល​ និងមានសភាពចូលរួមសរុបចំនួន ១៨៩ នាក់ ដែលអញ្ជើញមកពីគណៈវិជ្ជាជីវៈសុខាភិបាលទាំង៥ រួមមាន៖ គណៈគ្រូពេទ្យ គណៈទន្តពេទ្យ គណៈឱសថការី គណៈគិលានុបដ្ឋាក និងគណៈឆ្មប ព្រមទាំងអង្គការដៃគូផងដែរ​ និងបានប្រារពធ្វេីឡេីង​នៅមជ្ឈមណ្ឌលសហប្រតិបត្តិការកម្ពុជា-កូរ៉េ នឹងបានរៀបចំដោយ នាយកដ្ឋានមន្ទីរពេទ្យ នៃក្រសួងសុខាភិបាល។

​ សម្រាប់ការប្រារពធ្វេីទិវាអនាម័យដៃពិភពលោកនេះដែរគឺ មានគោលបំណងសំខាន់ៗមួយចំនួនដូចខាងក្រោម៖

១) ជួយសហការគ្នា​ ដេីម្បីលើកកម្ពស់ការអនុវត្តអនាម័យដៃឱ្យល្អប្រសើរ(ដោយប្រើបច្ចេកទេសសមស្រប និងយោងតាម WHO 5 Moments) និងពេលវេលាសម្រាប់ការប្រើប្រាស់ស្រោមដៃសមស្របនៅក្នុងដំណើរការការងារថែទាំសុខភាពរបស់បុគ្គលិកសុខាភិបាល

២) ជួយជំរុញនិងលើកកម្ពស់ការដាក់បញ្ចូលអនាម័យដៃនៅក្នុងយុទ្ធសាស្ត្រជាតិរបស់ IPC ក៏ដូចជានីតិវិធីប្រតិបត្តិស្តង់ដា (SOPs) នៅក្នុងមូលដ្ឋានសុខាភិបាល ដោយអនុវត្តតាមអនុសាសន៍នៃផែនការសកម្មភាពសកល និងក្របខណ្ឌត្រួតពិនិត្យ ២០២៤-២០៣០ របស់អង្គការសុខភាពពិភពលោកដែលបានកំណត់រួច

៣) ស្វ័យភាពដោយលើកកម្ពស់ការយល់ដឹងអំពីការប្រើប្រាស់ស្រោមដៃមិនចាំបាច់ដែលប៉ះពាល់ដល់បរិស្ថាន ជាពិសេសការបោះចោលសំណល់ស្រោមដៃ។

​ ក្នុងឱកាសដ៏វិសេសវិសាលនេះ​ លោកជំទាវរដ្ឋលេខាធិការ បានផ្តល់ជាអនុសាសន៍ ដោយជំរុញឱ្យមូលដ្ឋានសុខាភិបាលទាំងអស់ សូមបន្តសកម្មភាពរបស់ខ្លួនដូចតទៅ៖

១) ត្រូវបន្តការអប់រំ និងបណ្តុះបណ្តាលបុគ្គលិកទាំងអស់អោយអនុវត្តអនាម័យដៃឱ្យបានត្រឹមត្រូវ

២) ត្រូវតែផ្ដល់សំភារៈបរិក្ខារប្រកបដោយគុណភាព ដូចជា ទឹកសាប៊ូ និងជែលអាល់កុលឱ្យបានគ្រប់គ្រាន់

៣) ត្រូវរៀបចំផែនការសកម្មភាពឱ្យមានថវិកាគ្រប់គ្រាន់សម្រាប់មន្ទីរពេទ្យនីមួយៗមានសម្ភារអនាម័យដៃគ្រប់គ្រាន់

៤) ត្រូវជួយជំរុញ​និងផ្តល់ព័ត៌មានត្រឡប់ជាលក្ខណៈបុគ្គលចំពោះនរណាមិនបានធ្វើអនាម័យដៃ

៥) ត្រូវបន្តការជំរុញនិងតាមដានបន្ត ដោយវាយតម្លៃការធ្វើអនាម័យដៃឱ្យតឹងរ៉ឹងនិងច្បាស់លាស់

៦) ត្រូវជំរុញនិងអនុវត្តភាពជាអ្នកដឹកនាំ ថ្នាក់ដឹកនាំ ប្រធានផ្នែកគ្លីនិកធ្វើជាគំរូល្អដល់បុគ្គលិកក្រោមឱវាទរបស់ខ្លួនម។

នៅចុងបញ្ចប់នៃសន្ទរៈកថា​ លោកជំទាវរដ្ឋលេខាធិការ បានកោតសរសេីរ​ និងថ្លែងអំណរគុណយ៉ាងជ្រាលជ្រៅ​ ចំពោះអង្គការ​សុខភាពពិភពលោក និងដៃគូរអភិវឌ្ឍន៍នានា ព្រមទាំងបុគ្គលិកសុខាភិបាលទាំងអស់គ្នា ដែលបានខិតខំប្រឹងប្រែងរក្សាថែទាំសុខភាពជូនបងប្អូនប្រជាពលរដ្ឋរបស់យេីង​ ដោយរស់នៅក្នុងបរិស្ថានស្អាត​ មានសុខភាពល្អ និងមានសុវត្ថិភាពដោយភាពជឿជាក់។

#CCN#MOH