សូមគោរពគាំទ្រប្រសាសន៍​ លោកជំទាវ​ សាស្ត្រាចារ្យ​ អុឹម​ សិទ្ធិការ្យ​ រដ្ឋលេខាធិការ​ក្រសួងសុខាភិបាល​ ក្នុងការលេីកទឹកចិត្ត​ ដល់ថ្នាក់ខេត្តដេីម្បីលេីកកម្ពស់គុណភាព​ សុខភាពមាតា និងទារក​ នៅក្នុងកិច្ចប្រជុំ គណៈកម្មការស្រាវជ្រាវ មរណភាពមាតា និងទារកជុំវិញកំណើត និងការឆ្លើយតប ជាមួយមន្ទីរសុខាភិបាលខេត្តកំពត និងខេត្តបាត់ដំបង​ ក្រោមប្រធានបទ​ “គ្រូបង្គោលស្តីអំពីការតាមដាន និងការឆ្លើយ​ មរណភាពមាតា&ទារក និងការឆ្លើយតប”

រាជធានីភ្នំពេញ៖ នាព្រឹកថ្ងៃអង្គារ ២រោច ខែពិសាខ ឆ្នាំម្សាញ់ សប្តស័ក ព.ស ២៥៦៨ ត្រូវនឹងថ្ងៃទី១៣ ខែឧសភា ឆ្នាំ២០២៥ លោក​ ជា​ សុភក្ត្រមុនីរ័ត្ន​ ប្រធានក្រុមប្រឹក្សាគណៈគិលានុបដ្ឋាកជាតិ​ អាណត្តិទី៣​ បានអញ្ជើញចូលរួមក្នុងកិច្ចប្រជុំ គណៈកម្មការស្រាវជ្រាវ មរណភាពមាតា និងទារកជុំវិញកំណើត និងការឆ្លើយតប ជាមួយមន្ទីរសុខាភិបាលខេត្តកំពត និងខេត្តបាត់ដំបង​ ដែលបានដឹកនាំក្រោមអធិបតីភាព​ ​លោកជំទាវសាស្រ្តាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល​ នឹងជាតំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នឹងមានការចូលរួមពីឯកឧត្តមវេជ្ជបណ្ឌិត ង៉ូវ កាង និងឯកឧត្តម វេជ្ជបណ្ឌិត ស៊ិក ប៊ុណ្ណា រដ្ឋលេខាធិកាក្រសួងសុខាភិបាល​ ដែលបានធ្វេីនៅទីស្តីការក្រសួងសុខាភិបាល។

​ សម្រាប់គោលបំណងនៃកិច្ចប្រជុំនេះដែរគឺមានដូចជាៈ
១) ការពិភាក្សាលេីករណីដែលកើតមានកន្លងមក
២) ការបង្ហាញអំពីមូលហេតុចំបងដែលបណ្តាលនាំឱ្យមានការស្លាប់មាតា និងទារក
៣) ការពិនិត្យមើលផែនការកែលម្អលេីគុណភាព​ ការផ្តល់សេវាជូនមាតា និងទារកដែលបានរៀបចំដោយខេត្តកំពត និងខេត្តបាត់ដំបង។

​ នៅក្នុងកិច្ចប្រជុំនេះ​ ឯកឧត្តមវេជ្ជបណ្ឌិត ង៉ូវ កាង បានចូលរួមយោបល់នូវមតិដែល​ត្រូវបន្តការលើកកម្ពស់ចំនួន​ ៤​ ចំនុចដូចជា:
១) ត្រូវបន្តបណ្តុះបណ្តាលឆ្មប អំពីឥរិយាបទក្នុងការបំពេញការងារនៅមន្ទីរពេទ្យខេត្ត និងមានការចូលរួមពីមន្ទីរពេទ្យសម្ព័ន្ធភាពផងដែរ
២) ត្រូវធ្វើការទំនាក់ទំនង​ មុនពេលបញ្ជូនអ្នកជំងឺក្នុងទិសដៅរក្សាសុវត្ថិភាពជូនអ្នកជំងឺ
៣) ត្រូវរៀបចំ Checklist អំពីហានិភ័យពេលមានផ្ទៃពោះនៅតាមទីតាំងផ្តល់សេវា
៤) ត្រូវលើកកម្ពស់ការអប់រំ​ នៅតាមសហគមន៍ ។

​ ជាកិច្ចបន្ទាប់នោះ​ លោកជំទាវសាស្រ្តាចារ្យរដ្ឋលេខាធិការ​ បានមានប្រសាសន៍ក្នុងកិច្ចប្រជុំ​ គឺត្រូវលើកទឹកចិត្តដល់ ថ្នាក់ខេត្ត លើកកម្ពស់គុណភាព សុខភាពមាតា និងទារក​ ដោយប្រកាន់ខ្ជាប់នូវការសំងាត់ កំណត់ពីកត្តាប្រឈមផ្សេងៗដែលពាក់ព័ន្ធទាំងម្តាយនិងទារក ហេីយត្រូវរៀបចំផែនការលើកកម្ពស់គុណភាព សុខភាពមាតា និងទារកអោយបានល្អប្រសេីរបន្ថែមទៀត​ ដេីម្បីជាអាទិភាពខ្ពស់នៅក្នុងគោលដៅអភិវឌ្ឍន៍ប្រកបដោយចីរភាព។ ជាពិសេស​ សូមមន្ទីរសុខាភិបាលខេត្តទាំងអស់ធ្វើការសហការជាមួយគណៈកម្មឱ្យបានល្អ និងធ្វើរបាយការណ៍រាល់ករណីមរណភាពមាតា និងទារកមកគណៈកម្មឱ្យបានទាន់ពេលវេលា។

​ ជាចុងបញ្ចប់​នៃអង្គប្រជុំ​ លោកជំទាវសាស្រ្តាចារ្យរដ្ឋលេខាធិការ ក៏បានថ្លែងអំណរគុណដល់​ អង្គការ WHO;​ UNFPA និង ថ្នាក់ដឹកនាំនៃក្រសួងសុខាភិបាលដែលបានចូលរួមគាំទ្រ​ ក៏ដូចជាថ្នាក់ដឹកនាំមន្ទីរសុខាភិបាល ខេត្តបាត់ដំបង និងខេត្ត កំពត ព្រមទាំងគណៈកម្មការស្រាវជ្រាវមរណភាពមាតា និងទារកជុំវិញកំណើតនិងការឆ្លើយតបទាំងអស់គ្នា​ ដែលបានតស៊ូ​ លះបង់និងខិតខំព្យាយាមបំពេញលេីការងាររបស់យេីងគាប់ប្រសេីរកន្លងមក។

#CCN#MOH