- This event has passed.
ក្រុមប្រឹក្សាគណៈគិលានុបដ្ឋាកខេត្តកំពង់ធំ បើកកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៦។
June 27
Event Navigation

ក្រុមប្រឹក្សាគណៈគិលានុបដ្ឋាកខេត្តកំពង់ធំ បើកកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៦។
ខេត្តកំពង់ធំ៖ នាព្រឹកថ្ងៃសៅរ៍ ទី២៧ ខែមិថុនា ឆ្នាំ២០២៦ ដោយមានការអនុញ្ញាតពីលោក ជា សុភក្ត្រមុនីរ័ត្ន ប្រធានក្រុមប្រឹក្សាគណៈគិលានុបដ្ឋាកជាតិ អាណត្តិទី៣ លោក ប៊ុន ស៊ីផេន ប្រធានក្រុមប្រឹក្សាគណៈគិលានុបដ្ឋាកខេត្តកំពង់ធំ បានដឹកនាំកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៦ នៅសាលប្រជុំមន្ទីរពេទ្យខេត្តកំពង់ធំ។
កិច្ចប្រជុំបានផ្តោតលើការពិនិត្យវឌ្ឍនភាពការងារក្នុងឆមាសទី១ ឆ្នាំ២០២៦ ការត្រៀមដាក់ឱ្យប្រើប្រាស់ប្រព័ន្ធចុះបញ្ជី និងបន្តអាជ្ញាបណ្ណជំនាន់ថ្មី (Version 2) ការពិភាក្សាអំពីនីតិវិធីស្នើសុំពិន្ទុការអភិវឌ្ឍវិជ្ជាជីវៈបន្ត (CPD) ព្រមទាំងការកំណត់ផែនការសកម្មភាពសម្រាប់ឆមាសទី២ ឆ្នាំ២០២៦។
ក្នុងឱកាសនោះ លោកប្រធានក្រុមប្រឹក្សាគណៈគិលានុបដ្ឋាកខេត្តកំពង់ធំ បានរាយការណ៍ពីសមិទ្ធផលការងារសំខាន់ៗ រួមមាន ការចេញអាជ្ញាបណ្ណថ្មីជូនគិលានុបដ្ឋាកចំនួន ២៨នាក់ និងការបន្តសុពលភាពអាជ្ញាបណ្ណជូនសមាជិកចំនួន ៥០នាក់។ គណៈខេត្តក៏បានសហការជាមួយមន្ទីរសុខាភិបាល និងអាជ្ញាធរមូលដ្ឋាន ចុះត្រួតពិនិត្យ និងណែនាំសេវាសុខាភិបាលឯកជន ព្រមទាំងចូលរួមសកម្មភាព និងកិច្ចប្រជុំសំខាន់ៗរបស់គណៈគិលានុបដ្ឋាកជាតិជាបន្តបន្ទាប់។
អង្គប្រជុំក៏បានពិភាក្សាអំពីការត្រៀមអនុវត្តប្រព័ន្ធជំនាន់ថ្មី ដែលនឹងអនុញ្ញាតឱ្យគិលានុបដ្ឋាកអាចចុះបញ្ជី និងបន្តអាជ្ញាបណ្ណដោយខ្លួនឯងតាមប្រព័ន្ធអនឡាញ ប្រកបដោយភាពងាយស្រួល តម្លាភាព និងប្រសិទ្ធភាព។ ទន្ទឹមនឹងនេះ ក៏មានការផ្លាស់ប្តូរយោបល់អំពីនីតិវិធីស្នើសុំពិន្ទុ CPD និងការរៀបចំសកម្មភាពបណ្តុះបណ្តាលបន្ថែម ដើម្បីលើកកម្ពស់សមត្ថភាពវិជ្ជាជីវៈរបស់គិលានុបដ្ឋាកក្នុងខេត្ត។
សម្រាប់ផែនការការងារបន្តក្នុងឆមាសទី២ ឆ្នាំ២០២៦ គណៈខេត្តនឹងផ្តោតលើការជំរុញឱ្យគិលានុបដ្ឋាកទាំងអស់មកចុះបញ្ជី និងបន្តអាជ្ញាបណ្ណឱ្យបានទាន់ពេលវេលា ផ្សព្វផ្សាយព័ត៌មានអំពីការប្រមូលពិន្ទុ CPD រៀបចំវគ្គបណ្តុះបណ្តាល និងសិក្ខាសាលាវិជ្ជាជីវៈ ព្រមទាំងពង្រឹងកិច្ចសហការជាមួយស្ថាប័នពាក់ព័ន្ធ ដើម្បីអភិវឌ្ឍវិជ្ជាជីវៈគិលានុបដ្ឋាកឱ្យកាន់តែមានគុណភាព និងស្របតាមស្តង់ដារជាតិ។


